Texnologiya sektori bosim ostida - Nasdaq fyucherslari keskin pasaydi

Amerika aksiyalar bozorining texnologiya sektori seshanba kuni kuchli bosim ostida qoldi. Investorlar FZTning foiz stavkalarini oshirishi mumkinligi va sunʼiy intellekt (AI)ga qaratilgan ulkan, qarz hisobidan moliyalashtirilayotgan investitsiyalarning barqarorligi xususida xavotirlanmoqda — bu esa Nasdaq fyucherslarining 2% dan ortiq pasayishiga olib keldi.

Savdolar boshlanishidan oldingi auksionda texnologiya gigantlarining aksiyalari qimmatdan tushdi. Nvidia va Alphabet qiymatining deyarli 3 foizini yoʻqotdi, Intel, Marvell Technology va AMD aksiyalari esa 6 foizdan 8 foizgacha pasaydi.

Tahlilchilarning bahosiga koʻra, hozirgi pasayish AI sektorining asosiy istiqbollari yomonlashganidan koʻra, investorlar kayfiyatidagi oʻzgarish bilan koʻproq bogʻliq. Shunga qaramay, bu holat bozor oʻsishining nisbatan kichik bir guruh texnologiya kompaniyalariga qanchalik bogʻliqligini yana bir bor koʻrsatib berdi.

Qoʻshimcha bosimni SpaceXning AI va infratuzilma loyihalarini moliyalashtirish uchun obligatsiyalar bozoriga chiqish qarori yuzaga keltirdi. Bu esa yirik texnologiya kompaniyalari sunʼiy intellektga haddan tashqari koʻp mablagʻ sarflayotgani va bu xarajatlarni tobora koʻproq qarz hisobidan moliyalashtirayotgani haqidagi xavotirlarni kuchaytirdi.

Hozirda bozor ishtirokchilari FZT yil oxirigacha foiz stavkalarini jami 50 bazis bandga oshiradi, deb kutmoqda — bu esa ikki hafta oldingi kutilmalarga nisbatan ancha qattiqroq pul-kredit siyosatidan dalolat beradi.

Shu bilan birga, Yaqin Sharqdagi voqealar ham diqqat markazida qolmoqda. AQSh Eronga 60 kunlik sanksiyalardan ozod qilish muddatini berdi, biroq mintaqada mavjud boʻlgan noaniqlik investorlar kayfiyatiga taʼsir koʻrsatishda davom etmoqda.