Lindt Qoʻshma Shtatlarda bolalar mehnati bilan bogʻliq daʼvoga tortildi

Shveytsariyalik shokolad ishlab chiqaruvchisi Lindt kompaniyasiga Qoʻshma Shtatlarda sudda daʼvo qoʻzgʻatildi. Kompaniya isteʼmolchilarni chalgʻitishda ayblanmoqda.

Daʼvogarlarning fikricha, Lindt bolalar mehnatini tugatish va inson huquqlarini himoya qilish ustida ishlayotganini ommaga eʼlon qiladi, biroq uning kakaosining bir qismi Gana va Kot-dʼIvuarda bolalar mehnati yordamida ishlab chiqariladi.

Daʼvo arizasiga koʻra, kompaniya oʻz taʼminot zanjirida bolalar mehnati mavjudligini 20 yildan ortiq vaqtdan beri bilgan, biroq shunga qaramay, isteʼmolchilarda buning aksi taassurotini yaratadi. Daʼvogarlarning fikricha, kompaniya bu amaliyotdan iqtisodiy jihatdan ham manfaat koʻradi.

Hujjatda qayd etilishicha, Lindt isteʼmol mahsulotlari uchun kakao donalarini toʻliq Ganadan, kakao moyini esa qisman Kot-dʼIvuardan sotib oladi. Ikkala davlat ham bolalar mehnatidan foydalanish masalasida yillar davomida xalqaro tanqidga uchragan.

Daʼvo arizasini International Rights Advocates tashkiloti taqdim etgan boʻlib, u ilgari Mars, Mondelez va Nestlé kompaniyalariga qarshi ham shunga oʻxshash ishlar qoʻzgʻatgan. Tashkilotning maʼlumotiga koʻra, yirik shokolad ishlab chiqaruvchilari bolalar mehnatiga qarshi koʻplab siyosat va majburiyatlarni eʼlon qilishgan, biroq ularning amalda bajarilishi koʻpincha muammoli boʻlib qolmoqda.

Lindt ayblovlarni rad etadi. Kompaniyaning bayonotiga koʻra, u bolalar mehnatining har qanday koʻrinishini qoralaydi va taʼminotchilarga qatʼiy talablar qoʻygan. Daʼvogarlar moddiy kompensatsiya talab qilishmayapti. Ularning talabi — sud kompaniyaga, ularning fikricha, isteʼmolchilarni chalgʻituvchi bayonotlar berishni taqiqlashidan iborat.

Manba: Investing.com