Germaniya Xitoy avtomobillariga bojxona tariflarini oshirishni koʻrib chiqmoqda

Volkswagen bir qancha zavodlarini yopayotgani haqidagi xabarlardan soʻng, Germaniya Xitoy avtomobillariga nisbatan bojlarni oshirish masalasini muhokama qila boshladi.

Saksoniya iqtisodiyot vaziri Dirk Pantser Yevropa Ittifoqini Xitoydan import qilinadigan transport vositalariga bojlarni oshirishga chaqirdi. Uning fikricha, bu Xitoy kompaniyalarini Yevropa ishlab chiqaruvchilari bilan hamkorlik qilishga va mahalliy ishlab chiqarishni yoʻlga qoʻyishga majbur qilishi mumkin.

Bu bayonot Volkswagenning Germaniyadagi toʻrtta zavodini yopishni koʻrib chiqayotgani haqidagi xabarlardan soʻng berildi. Ular orasida Saksoniyada joylashgan elektromobillar zavodi ham bor.

Volkswagenning bosh direktori Oliver Blume Xitoy avtomobillarini Yevropada ishlab chiqarish va Osiyo kompaniyalari bilan qoʻshma korxonalar tashkil etishni mumkin boʻlgan yechimlardan biri sifatida koʻrsatmoqda. Pantserning fikricha, agar Xitoy kompaniyalari Saksoniyada ishlab chiqarishni yoʻlga qoʻysa, bu ish oʻrinlarini saqlab qolishga yordam beradi hamda boj masalalari yuzasidan muzokaralar olib borish uchun imkoniyat yaratadi.

BYD kabi Xitoy avtomobil ishlab chiqaruvchilari Yevropada sotuvlarini jadal surʼatlarda oshirmoqda.

Germaniya, agar Xitoy kompaniyalari Yevropa bozorida faoliyat yuritishni istasa, ishlab chiqarishining bir qismini Yevropada joylashtirishi va mahalliy ish oʻrinlari yaratishda ishtirok etishi kerak, deb hisoblaydi.

Manba: Investing.com