BMWning choraklik foydasi 35%ga kamaydi

Germaniyalik avtomobil ishlab chiqaruvchisi BMW 2026-yilning ikkinchi choragi uchun moliyaviy natijalarini eʼlon qildi, unga koʻra kompaniyaning soliqqa qadar foydasi (EBT) 35,1% ga kamayib, 1,70 milliard yevroni tashkil etdi. Oʻtgan yilning shu davrida bu koʻrsatkich 2,61 milliard yevroga teng edi.

Kompaniyaning daromadi 7,9% ga kamayib, 31,26 milliard yevroni tashkil etdi, sof foyda esa 34,9% ga kamayib, 1,20 milliard yevroga tushdi.

BMW avtomobilsozlik biznesining EBIT marjasi 5,4% dan 2,3% ga qisqardi. Kompaniya bunga asosiy sabab sifatida Xitoyda keskin narx raqobati, AQShning qoʻshimcha bojxona tariflari va avtomobil sotuvlarining kamayishini koʻrsatmoqda. Tariflarning oʻzi marjani taxminan 1,25 foiz punktga kamaytirdi, biroq bu taʼsirning bir qismi chorak davomida amalga oshirilgan narx oshirishlari hisobiga qoplandi.

Ikkinchi chorakda BMW isteʼmolchilarga 590 947 ta avtomobil yetkazib berdi, bu oʻtgan yilning shu davriga nisbatan 4,9% kam. Eng keskin pasayish Xitoy bozorida kuzatildi — bu yerda sotuvlar 30,2% ga tushib ketdi. Buning aksicha, Yevropada sotuvlar 7,6% ga, AQShda esa 11,9% ga oshdi.

Elektromobillar segmenti ijobiy dinamikasini saqlab qoldi — batareyadan ishlaydigan avtomobillar yetkazib berilishi 5,2% ga oshib, 116 807 donaga yetdi, bu kompaniyaning umumiy sotuvlarining deyarli 20% ini tashkil etadi.

BMW bayonotiga koʻra, chorak davomida biznes muhiti yanada yomonlashdi, bunga Xitoy bozoridagi zaiflik va Yaqin Sharqdagi davom etayotgan ziddiyat ham sabab boʻldi. Kompaniya, shuningdek, xarajatlarni qisqartirish dasturi doirasida 2027-yil oxirigacha Germaniyada bir necha ming xodimni ishdan boʻshatishni rejalashtirayotganini tasdiqladi.